الاعلانات الاونلاين تسرق معلوماتك تضيع وكتك و تخرب التجربة مالتك
عالانترنت بشكل عام. و اهم شي, الاعلانات هي اكثر شي يعرضك
للفيروسات.
فيعني هلايام صار ضروروي تحجب الاعلانات، و اذا انت الك خلگ تگدر تحجب
الاعلانات من حياتك كلهه و من كل مكان.
جدا مفيد اذا تريد تحجب الاعلانات بالشبكة مالتك كلهه، و ايضا ممكن يفيدك تحجب اي نوع ما يعجبك من المواقع.
تگدر تغير اعدادت ال DNS من الراوتر علمود الشبكة كلهه و تگدر من الحهاز نفسة كذلك ايضا.
هسه تحتاج الارقام التحطهن الي هوة سرڤر ال DNS، تكدر تستعمل واحد عام و مجاني مثل AdGuard DNS.
و تكدر تسوي سرڤر DNS خاص بيك تگدر تحجب بي كلش هواي اشياء و تگدر تغير بي هواي، شوف Pi-hole.
حجب الاعلانات من الشبكة فد شي جميل بس مرات ما عندك وصول للشبكة المتصل بيهه فشوي يتعّب و ما يگدر يحجب كلشي. اذا تريد تحجب كلشي لازم تستعمل طرق اخرى و كل جهاز بحد.
اذا لا سمح الله انت جاي تستعمل نسخة حديثة من ويندوز فأحتمال تطلعلك اعلانات بالواجهة لو ببعض تطبيقات ويندوز. تگدر تلغيهن من الاعدادات بس اذا متريد تدور بالاعدادات شوف هالاداة.
اذا جاي تستعمل برامج يطلع بيهة اعلانات، امسحهن.
اي برنامج يراويك اعلانات هوة برنامج زبالة دور على بديل، دائما اكو
بديل.
اكو متصفحات بيهن ميزة حجب الاعلانات، بس ما انصح بيهن لأن اغلبهن مال عاطلين ميفيدن المستخدم العادي و اكو التسويق مالتهم مثير للشبوه. المهم انة بالاخير ما اهتم يا متصفح تستعمل كلهن زبالة بس شوفلك واحد يدعم الاضافات علمود تنصب علية اضافات تفيدك بحجب الاعلانات.
احسن اضافة لحجب الاعلانات هي uBlock Origin، تشتغل على اي متصفح تقريبا و تگدر تعدل علية علمود يحجب اشياء اخرى من تنصبة حياتك تصير هواي احسن. اذا ميشتغل على متصفحك شوفلك متصفح يشتغل علية.
اذا بيك مرض مال يوتيوب ف uBlock Origin راح يحجبلك الاعلانات بس اكو بعد اشياء بيوتيوب مكروهه، من عدهن الاعلانات بنص الفيديو الي مالهن علاقة بيوتيوب.
المهم تگدر تحجب اغلبهن بأضافة اسمهه SponsorBlock.
راح تتخطاهن و ايضا راح تخلي اجزاء للفيديو مثلا يخليك تعبر لللقطة المهمة بالفيديو و توفر هواي وقت. طبعا هاي الاقسام المستخدمين مال الاضافة همة اليضيفوهه فأذا عجبك تكدر انت تضيفهن و تساعد الناس توفر وقت.
اذا متردد لان الاعلانات “تفيد اليوتيوبر” شوف عمو لويس شيگول يجوز يغير رأيك.
نفس المطور عندة اضافة ثانية اسمهه DeArrow.
هم حلوة تشيل الصور المصغرة المزعجة و تغير العناوين مال فيديوات علمود
تعرف الفيديو عن شنو يسولف قبل لا تفتحة.
اكو سكربتات مال JavaScript يشتغلن بالمتصفح مالتك و ممكن يسون هواي
اشياء علمود تتحسن تجربة التصفح عندك. تكدر تستعملهن تحجب الاعلانات من بعض
مواقع السوشل ميديا مثلا.
راح تلگاهن بعدة مواقع عالنت اشهرهن Greasy Fork و OpenUserJS و هماتين ب GitHub.
علمود تنصبهن تحتاج اضافة للمتصفح مالتك شوف Greasy Fork هناك اكو دليل يعلمك يا اضافة تفيدك.
عوف الموبايل.
حولت اغلب الاشياء الاسويهه للحاسبة و ما عندي جهاز IOS فما اگدر اسوي دليل مرتب فيعني روح شوف قسم الايفون و الاندرويد ب FMHY.
لكن بأختصار اذا انت عالاندرويد استعمل Firefox و uBlock Origin و
استعمل تطبيقات معدلة و
تطبيقات
بديلة.
اذا عندك موبايل صيني ويطلعلك اعلانات بالجهاز الغيهن من الاعدادات، و جرب
تغير ال Launcher
مالتك.
اذا عندك جهاز IOS شوف Orion
Browser و Stay for
Safari.
كذالك ايضا جرب تنصب تطبيقات من برة ال
App Store، مو سهل و بسيط مثل الاندرويد بس ممكن يفيدك هواي.