تگدر تقرصن اغلب الالعاب الي تنزل عالحاسبة، اذا تنزل لعبة و ما بيهه برنامج DRM فملفات اللعبة تگدر تنسخهه لأي حاسبهه و تلعبهه بسهولة، هذني الالعاب تگدر تقرصنهن باليوم الي ينزلن بي.
مشكلتنة وية برامج ال DRM، يخلوهن باللعبة علمود يمنعون الناس تسوي هاي الحركة يعني فد نوع من الحماية ضد القرصنة، اكو DRM يتكرك بسهولة مثل Steam DRM و اكو صعب مثل Denuvo.
اكو العاب قديمة شوي بيهة Denuvo لهسة ما تكركت، و اكو حدثوهن و شالو Denuvo لان يكلف الشركة فلوس و يأثر عالاداء مال الالعاب.
بالنسبة للألعاب الي بيهه Denuvo لهسة ارخص طريقة تلعبهه هوة حساب ستيم اوفلاين، شوف البدائل جوة.
اول شي شوف هذني المصادر يتعمقن بالموضوع و هواي احسن من اي شي اگدر اكتبة:
ممكن تحتاج VPN، اكيد راح تحتاج حاجب اعلانات.
راح تلگة هواي روابط لمصادر و مواقع تتعلق بالقرصنة فوگ اهمشي تبتعد عن المواقع الغير موثوقة، ابحث بأكثر من موقع حاول تلگة احدث نسخة من اللعبة التريدهه علمود ما تحير شلون تحدثهه اذا احتاجيت بعدين.
اكو مواقع يوفرون فد شي اسمة ريباك (repack)، الريباك هوة نسخة مضغوطة من اللعبة على مود التحميل يكون سهل، المشكلة الوحيدة بيهن احتمال التنصيب شوي يطول، بقية الالعاب اغلبهه منصبة و جاهزة بس لازم تفك الضغط عن الملفات.
من تجي تريد تحمل لو تلگة رابط تحميل مباشر (DDL - Direct Download Link)من موقع استضافة ملفات، لو تلگة ملف تورنت (torrent.) او رابط مغناطيسي مال تورنت (magnet link) و مرات ثنينهن، انة انصحك بالتورنت لان هواي ابسط و اسهل.
التورنت يربطك وية مجموعة من المستخدمين اسمهم Peers و يخليهم واحد يحمل الملف من الثاني، المستخدمين الي عندهم الملف كامل اسمهم Seeders و الي بعدهم يحملون اسمهم Leechers، اكيد كل ما يزيدون ال Seeders يصير التحميل اسرع.
علمود التورنت راح تحتاج برنامج خاص للتورنت مثل qbittorrent او Deluge تگدر لو تحمل ملف التورنت (torrent.) و تفتحة بالبرنامج لو تدوس على رابط ال (magnet) او تنسخة و تضيفة بالبرنامج و يبدي يحمل، من يكمل التحميل راح تصير انتة من ال Seeders و تساعد غير مستخدمين يحملون الملف.
بحالة التحميلات المباشرة (DDL) الملفات موجودة ب سرڤر على موقع استضافة ملفات. المشكلة هية هذني المواقع تعبانات يحطون حدود غبية و يحاولون يخلوك تدفع فلوس علمود تشيلهن و مرات تلگة التحميل مقسم اجزاء عديدة يعني بأختصار يتعب ازيد من التورنت.
زين شنو فايدتهن؟:
حالة حال اي تحميل عادي فالامان مالتة ازيد من التورنت اذا تخاف من المسائلة القانونية.
مرات اسرع او اكثر اعتمادية من التورنت. التورنتات المشهورة تحميلهه بطيئ لان هواي ناس يحاولون يحملوهه، و الي مو مشهورة بطيئة لان ال Seeders قليلين مرات ما تگدر تحمل اصلان اذا ماكو Seeders او محد منهم متصل
بالنسبة للتحميلات المباشرة انصح تشوفلك مدير تحميلات. يساعدك ترتب التحميلات و تكمل التحميلات الي تفشل، مرات حتة يسوي التحميل شوي اسرع، انصحك ب IDM, FDM و Jdownloader2، شوف القسم مال مدير الملفات ب FMHY علمود معلومات اضافية.
الالعاب المنصبة و جاهزة بس لازم تفك الضغط عن ملف ال zip. او rar. راح تلگة اللعبة و المشغل مالتهه جوة. اذا اكو اجزاء بس فك الضغط عن اول جزء و هوة يكمل و يفك ضغطهن كلهن.
بقية الالعاب مثل الريباك عالاغلب راح تلگة ملف اسمة setup.exe ينصبلك اللعبة حالهه حال اي برنامج عادي.
اكو العاب مقرصنة الهن سرڤرات بحدهن خاصة بيهن يعني من تلعب كل الوياك مقرصنين اللعبة همين، و عالاغلب بدون anticheat مو احسن شي بس هواي احسن من كلشي ماكو.
الطريقة الثانية علمود تلعب أونلاين هي باستخدام ثغرة Steamworks API، اللي تستغل لعبة اسمهه Spacewar وهي لعبة تجريبية من ڤالڤ مخصصة لاختبار ميزات الأونلاين بستيم، حتى تخدع ستيم وتشغل لعبة مقرصنة، وأحيانًا توصل حتى لسيرفراتها الرسمية.
تسوي هالشي بنفسك أو تدور الملفات المطلوبة مو شي كلش بسيط، فأنصحك بموقع online-fix.me. هذا موقع يوفر الملفات والتعليمات حتى تلعب الألعاب المقرصنة أونلاين، وهمين بي العاب كاملة مقرصنة.
بي مشكلتين بسيطات، اولا تحتاج حساب على مود توصل للروابط مال تحميل، و الموقع باللغة الروسية فأحتمال تحتاج تترجم الصفحة.
علمود بعد معلومات عن تكريك الالعاب شوف FMHY.
اذا متريد تقرصن الالعاب بس بعدك ما تريد او ما تگدر تشتري الالعاب بسعرهن الكامل، اكو شوية بدائل ممكن تفيدك:
شوفلك غير هواية، سويلك شي ما يكلف هلگد فلوس او وقت محد حاط براسك مسدس و گايللك العب.
اذا لعبة اونلاين و جماعتك يردونك تشتريهه علمود تلعبهه وياهم خلي همه يشتروهه الك، و اذا لا، انتظر ينزل عليهه تخفيض اللعبة ما راح تطير و لا راح تتغير و لا تصير مملة.
ستيم بي ميزة عظيمة اسمهه (Family Sharing) تگدر تشارك بيهه العابك وية غير حسابات مال ستيم، بس اكو العاب ما تدعمهه شوف صفحة المتجر مال اللعبة مكتوب بيهه.
الحساب الاوفلاين هوة حساب ستيم محولينة لوضع الاوفلاين من الاعدادات فما يگدر يستعمل اي ميزة مال ستيم الهه علاقة بالاونلاين، بهاي الحالة الحساب ممكن يتشارك بين اكثر من حاسبة و اكو ناس يبيعون هذني الحسابات.
راح تلگة محلات و صفحات و مواقع الكترونية تبيعهن و رخيصات نسبيا يعني ما يوصل خمسة دولار، من تشتري راح ينطوك تعليمات شلون تسجل دخول و تحمل اللعبة و تحول الحساب اوفلاين و تگدر تلعب براحتك بس بدون اي ميزة اونلاين.
ما اگدر انصحك بأحد يبيعهن لان كلهم لو اسعار غالية لو مشبوهين بطبيعتهم.