اذا ما عندك مشكلة إن الحكومة مالتك أو مزود الإنترنت (ISP) يشوفون المواقع الي تزورهه و الخدمات الي توصلهه عالنت، وما تحس انت مقيد باستخدام الانترنت و تگدر توصل اي خدمة تريدهه بدون حجب، فـعلى الاغلب انت ما تحتاج VPN.
اذا تعيش بدولة بيهه حظر على مواقع و خدمات معينة او ممكن تتعرض للمسائلة القانونية اذا قرصنت مواد عليهه حقوق من النت، فأنت تحتاج VPN.
طبعا خلي ببالك اذا انت تريد كامل الخصوصية على الانترنت فال VPN مراح يكفي، الي يريد يتتبعك راح يتتبعك و لازم تسوي هواي اشياء بعد و بالاخير ما تكدر تصير مجهول مية بالمية.
ال VPN يحول البيانات مالتك من خلال سرفر خارجي و يشفر البيانات مالتك، هالايام كل المواقع بيهه تشفير بس ال VPN يشفر كلشي. الاهم من هاي، لان بياناتك جاي تعبر سرفر خارجي يصير عبالك انتة جاي توصل لذاك الموقع او الخدمة من السرڤر الخارجي و من البلد الي موجود بي.
فيعني راح يسمحلك تفوت مواقع محجوبة أو تشوف محتوى من دول ثانية، لأن موقعك الجغرافي صار يبين من مكان السيرفر. و راح يخلي مزود الإنترنت يشوفك متصل بسيرفر VPN و اكو بيانات جاي تعبر، بس ما يعرف بالضبط شنو جاي تتصفح.
فإذا تحس انت تحتاج VPN روح تصفح قسم ال VPN و الاد بلوك ب FMHY
هسه انت ربطت على VPN و مزود الخدمة ميشوف نشاطك، بس مزود ال VPN يگدر يشوفة و يگدر يسجلة و يگدر يستعلمهه كبيانات يبيعهه او يسلمهه للسلطات القانونية، طبعا اكيد اغلب شركات ال VPN يگولون احنة عدنة سياسة ما نسجل اي شي (No Logs Policy) بس هاذ حچي يگدرون يچذبون.
فإذا تريد خصوصية عالية سوي VPN خاص بيك او استعمل Tor للتصفح راح يطيك خصوصية هواي ازيد من اي VPN.
شركات ال VPN يحبون يبيعولك شغلات زايدة مالهة علاقة بال VPN و مرات يذكرون شغلات ابد مو صحيحة مثلا يگلولك ال VPN يحميك من الفيروسات، هاي كلهة كلاوات المفروض ال VPN يسوي شغلة وحدة و يسويهه عدل.
ما انصح تستعمل VPN مجاني للقرصنة لأسباب مذكورة سابقآ تتعلق بالخصوصية بس اذا تريد تفتح خدمات محجوبة او تتخطى حدود على سرعة النت من مزود الخدمة راح يفيدنك.
بالنسبة للمجانيات أنصح بـ:
Cloudflare WARP
مشكلتة الوحيدة ميغير موقعك الجغرافي لأن يمرر بياناتك عبر سرڤر بنفس بلدك،
بس مجاني و سريع و سهل.
ProtonVPN
مجاني و سريع و سياسات الخصوصية مالتهم حلوة، بس ما يخليك تستعمل تورنت
معلسف.
مشكلة شركات ال VPN هية الكلاوات، يعني دائما عدهم خصم او عرض خاص يحاول يخليك تشترك طلطعش سنة ليگدام و يبيعلك اشياء ما تفيدك و مرات أسعارهم خيالية.
احسن واحد مدفوع هوة Mullvad، سريع و بي سعر واحد بدون كلاوات و الخصوصية عدهم فول.
تگدر تسوي VPN خاص بيك على سرڤر خاص بيك (VPS)، أرخص وأكتر خصوصية، بس يحتاج تأجر VPS و شوية وقت للتثبيت.
بالنسبة لسرفر خاص بيك انصح ب WireGuard حديث و سريع و بسيط.
تگدر تستخدم خدمات سحابية مجانية مثل Google Cloud أو Oracle Cloud و تسوي عليهن سرڤر، بس ما تضمن إنهم يبقون شغالين للأبد، فلا تستخدمهم لو ال VPN عندك كلش مهم.