سنك ثنگ هو برنامج حر و مفتوح المصدر لمزامنة الملفات، تگدر تستعملة علمود تزامن ملفاتك بين اجهزتك، بس تنصب البرنامج على جهازين و تربطهن سوة و تضيف مجلدات و تشاركهن.
طالما سنك ثنگ شغال و الجهازين اونلاين راج يزامنن، اذا الجهازين على نفس الشبكة راح يستخدمنهه، و اذا لا راح يستخدمن سرڤر مزامنة.
شنو الفايدة منة؟
- مشاركة ملفات وية غير ناس.
- مزامنة الصور، الفيديوهات و المستندات.
- مزامنة ملفات الضبط و الاعدادات بين الاجهزة.
- بديل بسيط للتخزين السحابي.
انة شلون استخدمة؟
كل واحد يستعمل سنك ثنگ بطريقة مختلفة، بالنسبة الي انة ازامن كل الملفات الي تهمني بين الموبايل، السرڤر و حاسبتي الشخصية. و غيرت خيار حفظ الاصدارات على السرڤر بس، بهاي الحالة:
- حتة لو حذفت ملف بشكل نهائي، راح يبقة على السرڤر لفترة من الزمن انة محددهه.
- ميحتاج اخاف على بياناتي، حتة لو ضيعت واحد من اجهزتي، لان عندي نسخ اضافية على اجهزتي البقية.
- ما ادوخ بسالفة نقل الملفات بين اجهزتي، بس لازم اخليهن بمجلد من المجلدات الي مزامنهن، و اغلب الوكت ميحتاج، لان انة اصلاً مزامن كل المجلدات المهمة.
- اگدر ازامن مجلدات و ملفات وية غير ناس بسهولة، بدون اي قيود على حجم الملف او نوع الملف.
حدود و قيود
المشكلة الرئيسية هي بما ان الملفات ما تتخزن على سرڤر سحابي، الاجهزة لازم شغال بيهه سنك ثنگ و مربوكة بالشبكة علمود تبدي تزامن. الحل الوحيد هوة تنصب سنك ثنگ على سرڤر او على جهاز شغال طول الوقت.
ملاحظات
- من تستعمل البرامج الرسمية مال سنك ثنگ، خيار حفظ الاصدارات مطفي افتراضيا. يعني اذا حذفت ملف على جهاز، راح ينحذف عالجهاز الثاني من يتزامنن. تگدر تغير هاذ السلوك بسهولة بأعدادت مجلدات المزامنة، و تگدر تسوي غير اشياء، مثلا تخلي مجلد يستلم ملفات بس، او ما يحذفهن ابد، و بعد هواي خيارات.
- اكو برامج لاغلب الاجهزة الشائعة، ما عدا اجهزة ال IOS. فأذا عندك جهاز ايفون، شوف هالمقال راح يساعدك بهالموضوع.
- مراح تگدر توصل لواجهه الويب مال البرنامج من غير جهاز، اذا ما غيرت ال listen address بالاعدادات او ملف الضبط.
- على الاندرويد، النضام احتمال يمنع سنك ثنگ يشتغل بالخلفية، و لازم تغير بالاعدادات على مود يبقى شغال. شوف Dont kill my app! هنا تلگة الحل.